Written by: Senior Kiongos
Tugo chakore ka Bihaan chopo e od apinypiny mane Dhruv otere Thapki; oneno Dhruv kendo iye wang' matek. Thapki ringo ma podh e pat agoge. Dhruv gi Bihaan moko lweny. Adhong' nyoro jatelo kendo opodho piny. Jokapandey duto molo. Thapki kwako Vasundara ka ywak. Vasu jiwe ni kik obed gi bwok, gin kode. Pandey kwayo Bihaan mondo oter jiduto dala, owene lee mobalo gi anyuolane no onyum e od ang'ech. To ka pok lewe olwar, Dhruv kao pala ma chuo-go tie Bihaan. Jiduto buok. Dhruv mako Thapki, kaeto onyiso anyuolane mondo odog chien; owuo gi mirima ma kakni ni ng'ato achiel kuom-gi nyaka tho, kinde gi jawasike ma Bihaan; oredo ni Thapki en mwande, en e jaherane mokuongo!
Vasundara kwayo Dhruv mondo ohore, gin anyuola. Dhruv nyiere, kaeto penje ni, ‘Anyuola mane ma iwacho Mama?’ Mirima kwale, owacho ni, ‘Anyuola ma ithing'a-go no ne nikure diere ma minwa, owadwa kod jaoda ne wuonda! Ne un kure? Donge ne ugoyo bucha piny ma ung'ado ni ber ka utieko ngimana! Ne umaya chunya, ne uyombo gi mwanda, ne ukwalo ngimana! To kik udew, nikech ase chier; aduogo kao raticha. Kendo obirotimo gimoro amora mondo ayude, kata ka dhichuna ni anegu utee!’ Bihaan kok ni, ‘Dhruuuv!’ Dhruv wachonegi mondo gidog chien. Pandey nyiso Dhruv ni onge kaka ginyalo loko duto mosetimore. Dhruv duoke ni, ‘Nyalore Baba. Dwanyalore kawuono! Adwatieko singo keny modong' kinda gi Thapki.’
Dhruv dhaone Jokapandey; osiayo-gi ei kej moro manosehiko bathe kanyo; obwono mar kao ngima Thapki ka di girem luoro amuri mare; ochiko magina e wi Thapki. Luoro dhiro Jokapandey ei kejno. Dhruv kokne Shraddha mondo oluw bang'gi. Shraddha penje ni, ‘ere kaka inyalo soya ei kej to an ka mar konyi, anbe ok adwar anyuolano mana kaka ok idwargi, gin rourni!’ Dhruv miye siem ni ka odwabet kanyo to ochung' tir kendo oriw dhoge ma malo gi ma piny; odhiro Thapki ir Bihaan, kaeto ochikonegi magina; ogolo rimot kendo ochomo e kej, kaeto oswiche... Ich kwiri manochiko ei kejno chako thung'o anyuolane. Bihaan penje ni, ‘Dhruv, itimo ang'o?’ To Dhruv duoke ni, ‘ngima anyuolani dhilal ei dakika abich kende, resruog-gi nie lweti!’
Jokapandey chako fuolo. Bihaan bwok. Dhruv nyise ni ka oyie gi dwache to onyalo chungo kwiri no ka diemo wang' kotiyo gi rimot, kotemo balo kode to ong'e ni gidhi tho! Bihaan kokne ni, oloyo inega, to weri gi anyuolana! Dhruv duoke ni, ‘ok adich gi negi, dwacha en ni ineg wat kindi gi Thapki chutho. To nikech ningala mitieko kweche mag arusa gi Thapki, adwani itim ataro mag kweche go, adwani uluor majni ka ukwedru nyadibiryo mondo wat kindu orum chutho, nikech Thapki ena mara, en mara kenda, Bihaan! To ng'e ni udong' gi thuolo machwok ahinya, odong' dakika adek kende to ngima jomihero lal.’
Dhruv kwayo Shraddha mondo osomne Thahaan muma sama giluoro maj keny ataro. Shraddha kwere ni ok olony gi bug keny, ong'eyo mana lamb akwede. Dhruv duoke ni mano ema odwaro, nikech dwache en ketho chutho wat manie kind Thapki gi Bihaan; onyiso Bihaan mondo otim piyo nikech odong' mana gi dakika ariyo.
Bihaan gi Thapki ywak ka luoro maj akwede, sama Shraddha to weronegi lamb thegruok... Dhruv buonjo moos kochikonegi magina; owachonegi ni safar ang'wen mokuongo oserumo, koro Thapki ema jo otel e safar modong'. Thapki rango Bihaan ka pii wangene mol. Bihaan dwong'one wiye kaka ranyisi mar miye thuolo. Thapki telo ka Bihaan ni kabang'e. Giluoro mach.
Jokapandey pod oriknegi e kej kendo kwiri medo hinyo ngimagi. Gitangni kaa gi kacha to kata otuch mar resruok ok minjnegi. Dhruv wacho ni koro odong' safar achiel kende to wat kind Thapki gi Bihaan rumo chutho! Shraddha rango Dhruv gi chuny marach, paro moro duong'o wiye, okiyo Dhruv kendo opuko buru e wang'e. Dhruv kwang' ma bol rimot piny; omako wang'e. Bihaan kwanyo rimodno leplep kendo ringo ma yawne anyuolane. Shraddha be ywayo Thapki bathe.
Ka Bihaan omo ni odwogne Dhruv ni i, to Dhruv kirre kendo chikone magina. Dhruv wachone Bihaan ni nikech en e chakruog gigo duto, odwanege mondo odong' gi Thapki. Jiduto kwayo Dhruv mondo ohore. Dhruv miyo Shraddha siem mager ni obirorakre kode ri gi ri kuom wuonde kendo.
Piny ochamo Vasundara; orango Dhruv kendo oparo kaka ne giherore; wuode ma ayula ok neter ka pok onene, wuode mane ohoyo e bembene chakre tinne nyaka obedo ojana mopong', wuode ma sani koro olokre sudhe, ng'uro, guyo to kayo; ochako oparo ni Pandey noting'o magina moro e ofuke, magind Dhruv ma nyo okao kuome; ogoyo ondamo ariyo-adek chien, kaeto owuodho magina e ofuk Pandey moos, ka pok oholo matek ni, Dhruuuv! Jiduto bwok kendo lokre ka range. Vasu goyo ondamo ang'wen-abich mbele, kaeto ochomo magina e wii Dhruv. Dhruv gi jiduto buok matek.
Vasundara wachone Dhruv ni, ‘in e nyathina mokuongo, nyathi manomiyo oluonga ni miyo; napiri, napidhi, nariti kendo puonji wuotho e yor ratiro kata ka pok imol, kendo niwuotho e yorno nyaka idoko wuoyi mopong', to kawuono... kawuono itimo richo; itimo richo maduong' mana kaka abe natimo richo kuom ne yieni donjo e rum Bihaan; nabet e nyim jiduto kang'eyo maber ni in emibet gi Thapki e altar, ok Bihaan, to onge kaka nanyalo timo nikech nibwogo kao ngimani kafulo plandi; adiera, lit mar miyo nokwala kendo naling' kaka nidwaro; natimo richo nikech chunya ne gombo yudo morne kendo, to gima adhitimo kawuono ok en richo, adhiketo duto kare; ket magina mirieyo ewi owaduno piny kata achwadi risasi sani!’
Pandey penjo Vasundara ni, ‘ang'o ma itimo?’ To Vasundara miye it modino; okok ni, ‘ket bundeno piny Dhruv Pandey!’ Dhruv duoke ni, ‘ok anyal mama, an wuodi, ang'eyo ni ok inyal chwada risasi nikech ihera ahinya, ne kata kaka lweti tetni; adwanego Bihaan Pandey ka ineno mondo anyisi ni igena!’ Thapki ywak ni, ‘dawe!’
Vasundara rwako risasi e magina kendo siro lwete mane rik tetni; ochomo bunde ir Dhruv tir kendo obayo risasi... Jiduto buok matek... Remo kirre e wang' Thapki... Dhruv, Bihaan gi Thapki rangore gi buok... En Bihaan... Bihaan ema risasi omako kore! Jiduto bwok. Dho Vasundara moko; ogoyo ondamo chien kokwang'... Bihaan rango Dhruv mamuol... Vasundara bet piny ka ywak, sama Bihaan to podho... Jokapandey sire... Dhruv wuok kanyo ka ywak; oparo diere mane gitindo ka Bihaan wachone ni ohere ma onyalo kata chiwo ngimane mondo orese; oparo kaka Bihaan nochikore e mbelene morese nikech en ema risasi Vasundara nochome tir.
Jokapandey ywagore. Pandey gochone gach osiptal kendo gitero Bihaan e od thieth leplep. Dhruv ochung' chien karango kaka lakteche gi anyuolane ringo gi Bihaan e od thieth. Thapki weyo lwet Bihaan ka ywak... Dhruv paro chien, diere moro ma Bihaan nohinyore; Bihaan nyiso laktar ni nolwar e ngas, to Dhruv kwer ni Bihaan ok nolwar e ngas, nohinyore kogemona kait; Laktar wacho ni pok norado gi owete moherore ka yawuot Balwinder Pandey, en gi hawi! Dhruv ywak tok paro magi.
Lakteche mulo ka gi kacha mondo gires ngima Bihaan na gisano medo rachore! Thapki ywak ka paro hera kinde gi Bihaan. Wer mar Ranjha tugo... Laktar golo risasi e agog Bihaan. Adundo Bihaan podho! Masinde mane rik siro ngimane chako ywak...
1100 views
Share On:
